XIX зууны сүүлч ХХ зууны эхэн үеийн Монголын түүх, шашин, соёл урлагийн гайхмашигт өв, дахин давтагдашгүй дурсгал болох 'Чойжин ламын сүм' цогцолборыг Төрийн их сахиусны лагшин, Эрдэнэ билигт тунгалаг бишрэлт хутагт Лувсан хайдавын шашин номын үйлд зориулан 1904-1908 онд бүтээн байгуулжээ. Тус сүм нь өнөөг хүртэл дөрвөн төрийн нүүрийг үзэхдээ төр шашны хэрэгт харшлах аюул бүхнээс хамгаалах үүргээ гүйцэтгэн, 1930-аад оны ороо бусгаа цагийн хатуу сорилт, бэрхшээлийг даван туулсаар бидний үед хүрч иржээ. Үе үеийн лам хувраг, соёл шинжлэх ухаан төр нийгмийн зүтгэлтнүүдийн хичээл зүтгэл эрдэм ухааны ачаар Чойжин ламын сүм цогцолбор, бурхан тахилууд нь харьцангуй бүрэн бүтнээрээ үлдэж чадсан юм.