Хүн төрөлхтний бичиг үсгийн үүсэл нь Египет, Мессопотам (Өнөөгийн Ирак), Харрапа (өнөөгийн Пакистан)-д бие биеэсээ хамааралгүйгээр НТӨ 3500-НТӨ 3100 онуудын хооронд үүссэн гэж үздэг. Эдгээр бичиг үсэг нь эртний хүн хад чулуун дээр сүг зураг зурахаас эхтэй. Судлаачид хадны сүг зургуудад зарим нэгэн зохиомол тэмдэг тэмдэглэгээнүүд таарч байгааг ажиглаж байсан боловч тэдгээрийн утгыг тайлбарлагдах хэмжээнд нь таньж, уншиж байсангүй. Цаашлаад сүг зураг нь үсэг хэлбэрт шилжиж байгаа бодитой жишээ өнөөг хүртэл олдож байгаагүй юм. Хүннүчүүд бичиг үсэгтэй байсан тухай түүхийн бичвэрүүдэд дурьдагдах боловч бодитой уншигдаж тайлагдсан зүйл өнөөг хүртэл байхгүй байсаар ирсэн. Тэгвэл уг номын зохиогч С.Золбоо Хүннүчүүд хоёроос олон цагаан толгойтой, бичгийн олон хэлбэрийг ахуй амьдралдаа нэвтрүүлсэн оюуны өндөр соёлтой, хол ойрын олон тооны эртний улс орнуудтай харилцаа холбоотой байсныг энэ бүтээлээрээ археологийн олдвор дээр тулгуурлан баталжээ.