МЗЭ-ийн шагналт Чингисийн амиа, Хонидын зээ Бат-Очирын Туяа нь 1962 оноос уран бүтээлийнхээ гарааг эхэлжээ. 'Шувуудын ганганаан', 'Таван цагаан шувуу', 'Шулга болжморын жиргээн', 'Мөнгөн зүүний учиг' өгүүллэг, туужийн номоороо анх уншигч олны танил болсон. Бертольд Брехт, Анна Зегерс, Бруно Апитц зэрэг сонгодог зохиолчдын тууж, өгүүллэгийн герман хэлнээс орчуулсан. 1971 оноос телевизийн олон ангит 50 гаруй уран сайхны синхрон орчуулга хийж, дуу хоолойгоороо цэнхэр дэлгэцийн танил болсон. 'Босгоны хоёр талаас', 'Нинжин сэтгэл', 'Хясаан дундах сувд', 'Халхын суутай хүүхэн Хоролмаа 25 нас хүрлээ', 'Франц Сэндэм' зэрэг олон арван нийтлэл, хөрөг найруулал төвийн сонин хэвлэлд нийтлүүлж, 'Сэтгүүлч' сэтгүүлийн оны шилдэг бичлэгийн шагнал хүртэж байсан. 'Оройтсон бороо' дуугаараа олон түмэнд алдаршиж, улмаар 'Таван цагаан шувуу' таван цуврал романс, 'Би эрчүүдийг хүснэ' жүжгийн дуу, 'Марал цэцэг', 'Хуурын нулимс', 'Алтан номын үсэг', 'Хүсэл зөнгийн алтан хараацай', 'Хатан уул, Хаан балгас' зэрэг арав гаруй дуу, романсын яруу найргийн шүлгийг бичиж, дууны урлагт хувь нэмрээ оруулсан билээ.